Mga anak ni Cesar kina Sandra at Kath, inilantad na

HINDI lang naman ang dating Miss Earth na si Sandra Seifert ang naglabas ng picture ng anak nila ni Cesar Montano, na ikinakaila pa noong una. Maging ang live-in partner ni Cesar na si Socorro Angeles naglalabas na rin ng picture ng kanilang mga anak. May tatlong anak na sina Kath (Socorro) at Cesar.

Noong una, nagkabiglaan pa nang may maglabas sa Facebook ng picture ng binyag ng kanilang anak ni Cesar na si Kristen. Ang naglabas ay isang government official na kinuha nilang ninong sa binyag niyong bata at ipinagmalaki na kumpare na niya si Cesar. Tapos inalis din agad ang post, bagama’t may mga nakapag-save na ng picture. Nang malaunan si Kath na rin mismo ang nag-post ng picture ng anak na lalaki nila ni Cesar na si Liam sa mismong social media account niya.

Tapos ngayon nga, matapos ang mahabang panahon na itinatago at nagde-deny si Sandra, inilabas na rin niya ang picture ni Coco, na anak nila ni Cesar. Inamin din niya na paminsan-minsan lang magkita sina Cesar at Coco, at siguro nga ang picture na iyon ay nakatuwaan ni Sandra dahil sabi nga niya malapit na ang Christmas, at ano nga ba ang mahalaga kapag Pasko, kundi ang pamilya.

Ang nagiging biruan nga, dumarami na talaga ang anak ni Cesar. May dalawa siyang anak sa kanyang yumaong asawang si Marilyn Polingay. Tapos si Diego Loyzaga na anak naman niya kay Teresa Loyzaga. May tatlong anak din sila ng naging asawa niyang si Sunshine Cruz. Tapos ito ngang tatlo kay Socorro at isa kay Sandra. Sampu na silang lahat.

Pero hindi naman dapat na magkaroon ng controversy. Yumao na ang unang asawa ni Cesar na si Marilyn. Nag-split naman sila ni Teresa bago pa man ipanganak si Diego, at pagkatapos nag-abroad naman ang mag-ina. Noon naman niya niligawan at later on ay pinakasalan si Sunshine.

Nagkahiwalay naman sila ni Sunshine, bago ang kanilang affair ni Kath  at ni Sandra. Wala pa naman siyang pinakakasalan kahit na sino sa dalawa kahit na annulled na ang kasal nila ni Sunshine. Palagay naman namin, alam nila ang status ng isa’t isa kaya walang problema riyan.

HATAWAN
ni Ed de Leon